PHULLEN KOHHRAN LO PIAN DAN

(Phullen Kohhran lo pian dan chanchin tlangpui - Buata Bawihtlung)

Phullen Kohhran hi Khandaih khua aṭanga lo ding ṭan tawhin Khandaih Kohhran tih a ni a. Khandaih aṭang hian Kawnpui, Changzawl, Thirhlum leh Changzawl ah te an awm hnuah Phullen ah an kai a. Tichuan Phullen Kohhran tih a ni ta a ni.

Khandaih hi Mizoram hmar lamah awmin, Pawihbawiha fapa Vanphunga Sailo khua a ni a. Khaw taima tak, Buh leh bala a intodelh leh khaw nuam tak niin Zawlbuk pawh pahnih an nei a. Kha tih lai a Mizoram khaw lian ber niin, In 700 khua an in chhal a. Rev Liangkhaia ziah dan erawh chuan In 550 niin Mizoram khaw lian ber a ni a, Biate in a dawt a ni awm e.

Khandaih khuaah hian kum 1903 August ni 1 khan lal Vanphunga remtihnain Zosap Missionary te leh Bawrhsap ten Mizoram a Thingtlang Sikul hmasa ber an din a. Zirtirtu chu Khawnbawl Upa Vawma fapa Hrangsaipuia a ni. Sikul kha Pathian thu sawi nan leh zirtir nan hmangin Biak In ah hman a ni ve nghal a. Tichuan Ni 1.8.1903 chu Khandaih Kohhran  (Phullen Kohhran ni ta ) a lo piang ta a.

Khandaih ah hian ringtu hmasa Khuma leh Duma te chu Pathian thu hril a kalin “Pathian thu lo awih ve tawh rawh u” an ti a. Pathian thu awih an lo awm ve ta a. Kum 1904 November ni 2, Nilaini zan khan Mualveng Zawlbukah Zosaphluia (Rev DE Jones) kut atangin Lhandaih Kohhran a ringtu hmasate chuan Baptisma a chang a. Zosaphluia hi Pathian thuawih hmasate Baptisma a chan tir turin Khandaih ah hian ringtu hmasa te nen Aizawl atangin an kal a. He Baptisma chantirnaah hian Zirtirtu Hrangsaipuian Hming a lam a, Tirhkoh Vanchhungan Fenthlirin tui a lo keng bawk a, Ringtu engngemaw zatin Baptisma an chang a ni.

Tichuan Kohhran chu lo ṭanglian zelin, Kristian pawh an pung zel a. Khandaih hun lai hian Kristiante hi “Isua lama ṭang” an inti ṭhin an ti. Khandaih khaw Kristian hmasa te hian Pathianni chu serhin hna an thawk ngai lo a. Chu chu lal leh upa te chuan an hrethiam lovin an ngaithei lo hle a.

Kum 1905 kum tawp lamah Khandaihah hian Tuihri a leng thut mai a. Kum 1905 December ni 3, chuan khawnbawl upa pakhat chu Lal ina Zu an in laiin a kua a khawh a, chumi ni la la chuan a thi zui ta mai a. He hripui vang hian Puitling pawh mi 50 chuang zet an thi hman a. He hripui hi Pathian thu awih (Kohhran) hovin Ramhuai lal Sahmula an tihthinrim vanga lo thlengah an ngai tlat a. Sorkar mi tirh compounder in Tuihri damdawi Tuikhura a phul te pawh chu, an mahni tih hlumna tura Kristiante tihah an ngai zel a. Kristiante chu an haw zual hle a ni awm e.

Chutiang boruak rit tak karah chuan, kum 1906 khan Khandaih khua chuan Sangha an tlangvuak ta a. April ni 8 Pathianni ah an Sangha tlangvuakna Tuivai Lisei kamah chuan Harhna a lo thleng a. Maktak maiin Harhna chuan Hnuneka Pawite chu a rawn man a. Midang a kangkai zel a, khua a an haw thlengin Harhna chuan a tuam zel a. Khua chu a chiah hneh hle a.  

Kristiante an ngaitheihloh sa nak laiin Harhna chuan Kristiante chu a rawn tipung a. Kristianna chuan an khawtlang inrelbawl dan leh an khawtlang nun chu a rawn ti chhe vek dawnin an hria a. Pathianni a hnathawk lo a an serh te phei chu an haw hle a. Kawla ni chhuak chhiara fehchhuah pawhin, hawp khawp thar a harsat teh lul nen, Ṭam hmahruai an ni ngawt a lawm le, tiin Kristiante chu an haw hle a. Kum 1906 May thla vel aṭang chuan Kristiante chu tihrem tumin an tiduhdah ta a.

Kohhran mi, Kristiante chuan hmuhsitna, deusawhna, diriamna leh tihduhdahna chi hrang hrang an tuar a. Kum 1906 Pawl tlaka Khandaih aṭanga Changzawl Kawnpui an kai pawh hian, tihduhdahna chu a nasa zual zel a. Kawnpui aṭanga 1907 a Changzawl an insawn dawnte hian Kohhran mite ‘Kristian’ te chu insawn ve an phal lo a. Kawnpuiah hian Kohhran hruaitu Saiṭhuama hovin Biak In a hrangin an sa a. Hei hi Kohhran hoten Sikul ring lova a hranga Biak In an neih ṭanna a ni.

Changzawl awm hmuah Thanglailungah kum 1910 ah an kai ṭan leh a. Hetah hian Vanphunga fapa Awksarala chu lal a ni ve ta a. Kristiante tihduhdahna pawh a reh tawh a. Kohhran pawh a mumal ve hret hret a. Kum 1913 khan a vawi khat nan Kohhran Upa an thlang ve ta a. Aizawl aṭangin Upa Thanga ten kalchilhin Kohhran Upa hi an thlan pui a. Kohhran Upa atana thlanchhuah hmasa berte chu -

1. Upa Ralkaikima
2. Upa Tuaha
3. Upa Zokunga
4. Upa Kuaia

te an ni.

Thanglailung awm hnuah Thirhlum, Phullen leh Changzawlahte an awm leh a. Hengah hian Kohhran chu Pathian zarah nung takin a kal ve zel a. Biak In pawh a hrangin an sa thei zel a ni. Thirhlum kai 1914 hian lal Awksarala chu a piangthar nghe nghe a. Zawlbuk khuang pawh Biak In ah lakluh a ni a. Lal Awksarala piangthar hi Kohhran ten an hlawkpui hle a. Engemaw chen chu Zaipawlah te telin, Zaipawl conductor a ni nghe nghe a ni.

Thirhlum aṭangin Changzawl Kawnpui a an kai nawn hi kum 1916 vel ni a ngaih a ni a. Changzawl Kawnpui aṭang hian kum 1926 khan Phullen ah an kai leh a. Kum 1927 ah Biak In lawh ṭha takin an sa leh nghal mai a. Lal Awksarala kha kutthemthiam tak a ni a. Kohhran Pulpit tur pawh, nalh leh ṭha takin a siam a. Kum 1987 a Phullen Kohhran aṭanga Thanglailung Kohhran a indan khan, Awksarala Pulpit siam hi an chhawm a, tun thlengin hmuh theihin  la awm a ni.

Tichuan Khandaih Kohhran, tuna Phullen Kohhran nita hi, kum 1903 August ni 1 ah a lo piang a. Pathian thlarauthianghlim awmpuina zarah harsatna hrang hrang, Hripui te, tihduhdahna te leh Harhna te a lo paltlang tawh ṭhin a. Tunah thleng pawhin, Pathian awmpuina zarah Kohhran nung tak, Kohhran mipuite tana Thlarau lama purchawkna hmun a la ni zel a ni.

• Buata Bawihtlung, Phullen.