PHULLEN KOHHRANIN KAN BIAK IN THAR KAN LUAH TA E

Phullen Presbyterian Kohhran chuan, hun rei tak chhung kan lo sak tawh Biak In thar chu ni 3.8.2019 (Inrinni) zan khan luahin, Biak in thar luah pual hian zan inkhawmah hun ṭha tak leh hlimawm tak hman a ni.

He Biakin luah inkhawm hi Rev. Lalngaihawma, Bialtu Pastor-in a kaihruai a. Tantu chu Pi Nuhliri, kum 96 mi niin, Kohhran Secretary Upa F.Lalsangzuala'n thu pawimawh leh hun hman dan tur tlangpui a puang a.

Chairman-in thuchah tawi 'Biakbuk pawimawhna leh hlutna' chungchang tawifel tak leh kim ṭha tak siin a sawi a. Pathian hnena Biak In thar hlanna leh lawmthu sawi ṭawngṭairualna hun hman zui a ni a. 

Kohhran Zaipawlten mawi takin Halleluiah chorus an rem a, Kohhran Palai Zaipawl pawhin "Ka kawng hruaitu Thlarauthianghlim, kan ngai a che" tih hla chu thiam takin an sa bawk a. 

Hemi zawh hian Pi Lalbuangi leh Pu Lalchuailovate hla thlante chu hlim taka sak a ni a. Chairman sawm angin kohhran dang atanga rawn inkhawmte a ṭanga hla thlan, Pi Ngurzami thlan KHB No 303 na, "Lalpa i thlarauin fangchhuak leh la"  tih chu tui taka sakho leh a ni.

Biak In thar luah inkhawmah hian, Phullen vengthar Kohhran aṭangin mi ṭhahnem takin min telpui bakah Thanglailung Kohhran aṭangin Kohhran Upa 4 leh Kohhran member ṭhahnem tak ten min hmanpui bawk a. Bialtu Pastor nupui Pi Hanah Rempuii pa Upa C. Thansiama te chhung, Chanmari west Aizawl pawhin Biak In thar luah inkhawm hi min hmanpui bawk, kohhranhote kan lawm hle.

Biak In thar luah inkhawm hi Kohhran mipuiten kan hlut tlang hle a, khaw chhe deuh reng karah Biak In chhung ṭhutna leh galary ṭhutnate pawh a khat deuh vek a. Inkhawm ban dawnah Chairman, Bialtu Pastor Rev. Lalngaihawma'n Malsawmnain min ṭin a. Ban veleh thingpui ruai tui tak inho nghal a ni.                     

Kan hriat angin, Phullen Kohhran hian, kan Pastor kalchhuak ta Rev. HL Thianghlima hunlai, kum 2015 vel khan Biak In thar sa tur hian ruahmanna siamin hma lak ṭan a ni a. Biak In sak tur Lungphum inkhawm chu, Ni 16.07.2016 (Saturday) chawhma dar 10:30 am khan urhsun tak hman niin Bialtu Pastor Rev. Lalngaihawma chuan Lungphum hi a phum a. 

Biak in sak hi a hautak hle a, kum 4 vel zet sak a ni a, Kohhran hruaitute leh mipuite kan hah tlang hle a. Mahse, Pathianin awmpuina kan chang a, a thawk tam leh inpe nasa apiangten hlimna leh lawmna kan dawng zel zawk niin kan inhria a. Pathian hruaina a hetia luah theih a sak zawh a ni ta pawh hi, kohhran mipuite kan hlim tlang hle a ni.

He kan Biak In thar hi luah ni mahse, official a hawn erawh a la ni lo a. Kuminah hian Presbytery kan dawn dawn vanga luah luh lailawk a ni deuh ber awm e. He kan Biak In tharah hian Pathian Thlarau Thianghlim lo zalen sela, Kohhranhote tan thlaraua chakna hnar kan hmuhna hmun leh hlim tak leh lungrual taka Pathian kan biaka, kan fakhona hmun a lo nih zel theih nan Kohhran hote i ṭawngṭai zel ang u.