KAN PASTOR, REV. LALNGAIHAWMA TE CHHUNG KAN THLAHLIAM A TUL TA SI

Kum 2016 atanga Phullen Pastor Bial min awptu Pastor Lalngaihawma chuan, kum 4 pawh min awp pumhlum hmain Bial dangah min awm san dawn tih SYNOD inkhawmpuiin a puang ta thut mai a. Bial chhung Kohhran mipuite kan hamhaiha, kan hrilh a haiin kan ui tak zet zet hlawm a. Tam tak phei chuan, term khat pawh hmang zo lova sawn a ni chu, amah ui luat vangin kan hrethiam lo lek lek a ni. 

Kan Pastor hi kan ui a, Term khat pawh a hman zawh hma a sawn a ni ta mai kan hrethiam lo lek lek pawh hi a awm ve viau tho mai. Chutihrualin, kan Pastor hi mi bik, mi thiam bik a ni a, Ambassa Tripura-a a awm lai khan Kokborok tawng kha a ram mite tlukin a thiam a, kan hma a Tripura Synod pumpui Thalai (Youth) Inkhawmpui hunah pawh Speaker turin an lo ruat lawk tawh hial a. Chutiang taka Tripura lam pawhin an duh leh mamawh ngawih ngawih chu, Tripura rama Kohhran insawhngheh zelna tur atana mamawhna a sang em a. Chutiang avang chuan Phullen Pastor Biala a hun pawh hmang zo hman lovin Synod-in a sawn ta mai ni awmin an sawi a. Chutiangte a nih avang chuan, ui viau mah ila, Pathian leh a Kohhrante tan tiin, hnuk ulh teuhin kan thlahliam ta a ni.

BIAL HUAPIN THLAHNA HUN HMAN A NI:

Phullen Pastor Bial chuan, Ni 5.1.2020 Pathianni chawhnu khan Phullen Kohhran Biak Inah, Bial huapin Pastor Lalngaihawma te chhung thlahna inkhawm a hmang a. Bial chhung Kohhran mipui thahnem tak an inkhawm a. Bial hminga Pastor thlahna inkhawm hi Bial Chairman Upa C. Lalhmunmawia chuan a kai hruai a, Upa Vanlalnunga (Bial Inkhawmpui Treasurer) chuan thlahna Thuchah tawi a sawi a. Tin, Pastor Lalngaihawma pawhin inthlahna thu a sawi bawk. Bial zaipawlin thlahna hla  atan “Hmangaihna hrui vuanin” tih hla an sa a. Phullen Pastor Bial a, bial huap Committee hrang hrang – Bial Standing, Bial Hmeichhia, Bial KTP leh Bial Kohhran Pavalai Pawl ten Pastor hi ngaihhruihna thilpek an pek bakah, Bial chhung Kohhran pahnih niten ngaihhruina thilpek an pe ve ve. 

PHULLEN KOHHRAN-IN THLAHNA INKHAWM A SIAM:

Ni 5.1.2020 Pathianni zanah Phullen Kohhran chuan Pastor kalchhuak tur  thlahna inkhawm Biak Inah a siam a. He inkhawm hi Upa Ramzauva chuan a kai hruai a, Kohhran aiawhin Upa Zahnunan  Thlahna thu a sawi a, Pastor pawhin Kohhran hote thlahna thu a sawi bawk. Kohhran zaipawl ten “Vohbik Chibai” tih hla chu Pastor thlahnan an sa a, KPP zaipawl ten “Hmangaihna hrui vuanin” tih leh hla dangte, Pastor thlah nan an sak pawlh (medley) bawk. 

He inkhawmah hian, Kohhran huangchhunga committee peng hrang hrang – KTP, KPP, Kohhran Hmeichhia, Ramthar Commttee, Bethel Committee, Light & Sound, Decoration Committee ten Ngaihhruihna thilpek an hlan a. Inkhawm bân dawnah, “Hmangaihna hrui vuanin” tih hla chu Kohhran mipui inkhawm thahnem tak ten hnukulh teuhin an sa a ni. Inkhawm ban veleh Biak In chhung Maichham hmaah Pastor chhungkua hi an ding tlar a, Kohhran mipui ten a indawtin thlahna chibai an buk diat diat a, mittui a parawl nasa hle.

THANGLAILUNG KOHHRAN-IN THLAHNA INKHAWM A SIAM: 

Ni 4.1.2020 Inrinni zanah Thanglailung Kohhran-in Biak Inah Pastor thlahna hun a hmang bawk. He inkhawm hi Upa Buangdailova’n a kaihruai a, Upa B.Thangdailova’n Thlahna thuchah a sawi a. Kohhran aiawhin Upa Rothuama’n Ngaihhruina thilpek a hlan a, Kohhran Hmeichhia, KPP leh KTP te pawhin Ngaihhruina thilpek an hlan bawk. Thlahna inkhawmah hian, Kohhran Zaipawl, KPP Zaipawl leh Kohhran Hmeichhe Zaipawl te ten thiam takin thlahna hla an sa a ni.

BIAL THAR TUR PANIN PHULLEN AN CHHUAHSAN TA

Ni 7.1.2020 Thawhlehni khan kan Pastor kalchhuak turte hian Aizawl panin Phullen Pastor Bial an chhuahsan a. Aizawl-ah zan khat riakin, a tuk ni 8.1.2020 ah Tripura panin Mamit lam atangin an kal leh a, zanah Kawrthah khuaah an riak a. A tuk ni 9.1.2020 khan Tripura a an awmna tur chu tluang takin an thleng ta a ni. 

Kan thlah tâk Pastor Lalngaihawma hi, kan hriat angin mi ze nghet tak, hriatna tha bik nei, Committee kaihhruai thiam tak, Mizo tawng thiam em em a ni a. A ri buan buan lo a, mi ngainat a hlawh hle. Pathian leh a Kohhran  hmasawnna hi a ngaipawimawh em em a, a hun chhung rei lo teah pawh Phullen Pastor bial hian hmuh theih leh hmuh theih loh lamah, kawng hrang hrangin hma a sawn a ni.

Han sawi tel ve mai mai ila, Phullen Bial a awp chhung khan, kan Bial chu ram pum huapah mi a pho chhuak a, Bial Zaipawl chu Synod inkhawmpui 2018, Bungkawn Kohhranah khan an zai a, KTP Gen Conference 2020 Serchhip-ah pawh an zai leh dawn bawk a ni. Tin, Bial chhung Kohhran pahnihin Presbyterian English School (PES) kan nei ve ve bawk. Kohhran mal ang pawhin, Phullen Kohhran Biak In sak hahthlak lai a ni a, sum lamah indaihloh mangan lai a ni chungin, Biak In hi tha taka sak zawh a ni nghe nghe. Thanglailung Kohhran pawhin a hovin Silver Jubilee a lawm a, Jubilee Hall leh Committee room tha tak sa zovin, Pastor Lalngaihawma hian a hawng hman ve ve a ni. A hunlaia sak tan leh sak zawh Pastor Quarters pawh hi, pawisa hmuh zat nena chhutin, Quarters tha tak niin sawi a ni.

A chanchin leh a hun laia thil thlengte, an chanchin hrang hrang sawi tur tam tak a awm thei awm e. Keinin kan ui leh thlakhlelh ngawih ngawih kha, Pathianin a ram ti zau a, a Kohhranhote tinghet zel turin a mamawh si a, ui tak chungin thlahna chibai kan buk a tul ta a ni. An chhungkuain, an rawng bawl zelna turah duhsakna sang ber kan hlan e.