KTP PHULLEN BRANCH LO PIAN DAN

(KṬP Phullen Branch lo pian dan chhui zauna)

• By Buata Bawihtlung 6th July, 2018, 9:30 PM @ TKT

Phullen Kohhran hi Kum 1903 ah Khandaih awm lai khan Zosap Missionary te hmalaknain a lo piang a, Phullen a an insawn hnuah Phullen khua niin, Kohhran pawh Phullen Kohhran tih a ni zui ta a ni. Khandaih Sikul ah khan zirtirtu Hranga khan Pathian thu a zirtir thin a. Tin, Mizo zinga ringtu hmasa Khuma leh Duma te pawh Khandaihah khan kalin “Pathian thu lo awih ve tawh rawh u” tiin Pathian thu an lo hril tawh a. Tichuan, Pathian thu awih an lo awm ve ta a.

Chutia Pathian thu awih an lo awm ve takah chuan Zosaphluia (Rev. DE Jones) chu Khandaih ah hian a kal a. November ni 2, 1904 zan khan Khandaih Mualveng Zawlbukah Khandaih kohhran ringtu hmasate chu Baptisma a chan tir a. Tichuan Khandaih Kohhran chu, khaw hmun sawn te, tihduhdahna te leh hripuite leh harsatna hrang hrang karah a lo thang lian ve zel a. Phullen a an insawn hnu phei chuan Kohhran mipui pawh an tamin, a ngelnghet ve hle tawh a.

Phullen Kohhran a lo pian atanga kum 40 zet a lian hnu chuan, Kohhran huangchhunga thalai zawkte pawh chu tangkai taka hman theih an nih zia Kohhran mipuite chuan an hre chho zel a. Thalaite pual bika inkhawm hun siamte chu tha in an hria a. Tichuan, Phullen Kohhran Committee chuan, August ni 27, 1944 khan Kohhran huang chhunga Thalaite puala inkhawm hun bik siam chu a rel tlu ta a. Pathianni zan, Kohhran mipui inkhawm hma hun chu Thalaihote inkhawmna hun atan a ruahman ta a ni.

Tin, September ni 24, 1945 a Phullen Kohhran Committee ṭhukhawm chuan, Nilai Zan inkhawm mumal vak lo chu tharthawh leh a, Kohhran a thalai zawkte tan Pathian thu leh  kohhran inkaihhruaina kawnga inzir nan hman ni se an ti a. Thalaiho kaihruaitu atan chuan Upa Zulawma leh Kapruma leh Tawnkima (Upa) te chu Kohhran Committee chuan a ruat a. Anni kaihhruaina hian Nilai zan pawh chu Thalaite pual deuh bikin an hmang thin bawk a ni. Heng hun lai hian hmun dangah thalai pual inkhawm a awm em hriat a ni lo a, KTP pawh a la ding lo a, TKP pawh a la ding lo a ni.

Kohhran a lo thang lian zel a, kum 1950 vel khan hmun ṭhenkhatah thalai puala inkhawm neih leh thalai pual pawl bik chu Kohhran thenkhatah din a ni ve ta a. Chung ho chuan inzawmna pawh an nei lem lo a, a hming te pawh an duh duh an inphuah mai a. Kum 1951 July 31 khan Baptist Kohhran ah thalai pawl din an rel a, kum 1952 khan ṬKP din chu kohhran chuan a remti ta a ni. Chutiangin Presbyterian Kohhran ah pawh November 27, 1954 khan Kohhran ṭhalai pual a pawl din an rel a, hruaitu lailawkte an inruat a. SYNOD chuan kum 1954 ah KTP din chu rem a ti a, Kohhran tinah KTP din turin SYNOD chuan thu a chhuah ta a. Tichuan ni 22.2.1954 a an inhmuhkhawm hmasak ber chu ram pumah KTP din ni ah hman a ni ta a.

Phullen Kohhran ah chuan Thalai pual bik inpawlho ṭhin awm tawh mahse, SYNOD in Kohhran tinah KTP din tura thu a chhuah kum 1954 khan Phullen ah pawh KTP hi din ve nghal a ni a. KTP chu chak takin a kal ve zel a. Mizoram buai lai, kum 1967 a Vai (India) sipai ten Phullen Biak In an hal khan KTP minute bu leh lehkhabu engemaw zat a kang ral a, thil tam tak chhui let theih lohin a kang ral nghe nghe a. KTP din tirh khan T.Upa Thanzuala (Upa nit a) kha Phullen Branch KTP Leader hmasa ber a ni a, a dangte erawh hriat mai theih a ni tawh lo a. Kha tih laia KTP Phullen Branch hruaitute chu hengte hi an ni –

1. T. Upa Thanzuala (Upa)

2. Lalrema (Upa)

3. S.Rokima

4. Biakchhunga (Upa)

5. Thanṭhuama (Upa)

6. S.Rotluanga
7. Thangdailoa (Upa)
8. Zadenga (Upa)
9. Chuauṭhuama (Upa)
10. Ralṭhuama (Upa)
11. T.Upa Ramzauva
12. Zachula

Tichuan, Phullen Kohhran ah chuan KTP din hma kum 1944 August 27 ah khan Kohhran a Thalaite pualin inkhawm hun te siam hrangin thalai inpawl khawm lo awm tawh mahse, Mizoram SYNOD in KTP din tura a tih kum, 1954 khan KTP hi din a ni ve ta a. KTP Phullen Branch chu tluang takin a kal a, rambuai lai ten inkhawm te khaihlak deuh thin mahse, tun thlengin Kohhran kutke tangkai tak niin KTP Phullen Branch hi nung takin a la kal ve reng a ni.

****************